கனிமொழி ஜாமின் மனுவை விசாரிக்கும் 2 நீதிபதிகள் விலகல்

by Ganpat Sat Jun 18, 2011 5:47 pm

புதுடெல்லி, ஜூன். 18-

2ஜி ஸ்பெக்ட்ரம் வழக்கில் கைதாகியுள்ள கனிமொழியின் ஜாமின் மனுவை விசாரிக்கும் நீதிபதிகள் சதாசிவம், ஏ.கே.பட்நாயக் ஆகியோர் இந்த வழக்கிலிருந்து விலகிக்கொள்வதாக அறிவித்துள்ளனர்.

கனிமொழி ஜாமின் மனு மீதான விசாரணை, வரும் 20ம் தேதி (திங்கள்கிழமை) உச்ச நீதிமன்றத்தில் வருகிறது. இதை நீதிபதிகள் சதாசிவம், ஏ.கே.பட்நாயக் ஆகியோர் அடங்கிய அமர்வு விசாரிப்பதாக இருந்தது. இந்நிலையில், இவ்வழக்கிலிருந்து தங்களை விடுவிக்கும்படி, இருவரும் தலைமை நீதிபதி எஸ்.எச்.கபாடியாவிடம் கேட்டுக் கொண்டனர். விலகலுக்கான காரணம் உடனடியாக தெரியவில்லை. இதன் காரணமாக, நீதிபதிகள் ஜி.எஸ்.சிங்வி, பி.எஸ்.சவுகான் ஆகியோர் அடங்கிய அமர்வு சிறப்பு அமர்வாக, கனிமொழி ஜாமின் மனுவை விசாரிப்பர் என அறிவிக்கப்பட்டுள்ளது. ஸ்பெக்ட்ரம் ஊழல் குறித்து சி.பி.ஐ., விசாரணையை கண்காணிக்கும் பெஞ்சில், நீதிபதி ஜி.எஸ்.சிங்வி இடம்பெற்றுள்ளார் என்பது குறிப்பிடத்தக்கது.